Të paktën 14 emigrantë kanë humbur jetën të martën vonë në brigjet e ishullit të Kiosit në Greqi, pas përplasjes së një motoskafi që i transportonte me një anije të Rojës Bregdetare Helenike.
Ngjarja ndodhi në Ngushticën e Kiosit, pranë fshatit Vrontades. Autoritetet greke kanë njoftuar se motoskafi po kryente manovra të rrezikshme dhe një ndjekje po zhvillohej në kohën e përplasjes, sipas raportimeve të BBC-së.
24 persona u shpëtuan, disa prej të cilëve u plagosën rëndë. Të tjerë mbeten ende të zhdukur.
Roja Bregdetare nuk ka sqaruar ende rrethanat e sakta të përplasjes.