Roja Bregdetare Italiane ka njoftuar se 19 migrantë humbën jetën dhe 58 të tjerë u shpëtuan nga një gomone në rrezik, rreth 80-85 milje detare larg ishullit Lampeduzës, gjatë mbrëmjes së martës ose orëve të para të së mërkurës.
Operacioni u zhvillua në zonën e kërkim-shpëtimit të Libisë, pavarësisht kushteve të vështira të motit me dallgë deri në 6-7 metra. Zëdhënësi Roberto D’Arrigo deklaroi se forcat italiane ishin të vetmet në zonë, pasi nuk kishte anije libiane apo civile. Gomonia u pikas nga një avion zbulues italian.
Mes të mbijetuarve ka pesë fëmijë. Shtatë persona, përfshirë dy fëmijë, trajtohen në spitalin e Lampeduzës për hipotermi dhe helmim nga avuj hidrokarburesh, sipas kryetarit të bashkisë Filippo Mannino. Të shpëtuarit u transportuan drejt ishullit pas një udhëtimi rreth 10 orësh dhe ndodhen nën kujdes mjekësor.
Dyshohet se migrantët nisën nga Libia ose brigjet e Afrikës së Veriut. Shkaqet e vdekjeve përfshijnë hipoterminë, mungesën e oksigjenit dhe tymrat toksikë; disa viktima vdiqën gjatë transportit.
Lampeduza është pikë kryesore hyrëse në Evropë për migrantët nga Mesdheu. Sipas Organizatës Ndërkombëtare për Migracionin, 624 persona kanë vdekur ose zhdukur në Mesdheun qendror këtë vit. Ministria e Brendshme italiane raporton 6 117 migrantë të zbarkuar në Itali deri tani.
Ngjarja rikthen në vëmendje incidentin e gushtit të vitit të kaluar, ku 26-27 persona humbën jetën në dy mbytje anijesh pranë ishullit.