Një plagosje aksidentale me armë gjahu ndodhi pasditen e së premtes në Laknas të Kamëzit, ku një 30-vjeçare mbeti e lënduar në faqe.
Sipas njoftimit të policisë, shtetasja E. L., rreth 30 vjeçe, ndodhej në oborrin e shtëpisë së xhaxhait të saj kur 73-vjeçari N. Sh., banues në Laknas, qëlloi me armë gjahu për të larguar një kafshë. Një saçmë goditi faqen e mbesës së tij.
Rreth orës 15:30, e lënduara paraqitej për mjekim në poliklinikën e Kamëzit. Grupi hetimor shkoi menjëherë në vendngjarje për zbardhjen e rrethanave dhe identifikimin e autorit.
Si rezultat i hetimeve paraprake, policia identifikoi dhe shoqëroi 73-vjeçarin N. Sh. në komisariat për veprime të mëtejshme proceduriale. 30-vjeçarja, pas marrjes së ndihmës mjekësore, kaloi në banesë dhe ndodhet jashtë rrezikut për jetën.
Vijon puna për dokumentimin e plotë të rastit.