Më 26 prill 1986, në orën 1:23, në Çernobil të Ukrainës shpërtheu një reaktor bërthamor. Aksidenti pati pasoja të mëdha për ambientin, jo vetëm në Bashkimin Sovjetik të atëhershëm, por edhe në Evropën Veriore, Qendrore dhe Juglindore.
Reja radioaktive u shpërnda shpejt drejt Bjellorusisë dhe Rusisë. Dy ditë më vonë mbërriti në Skandinavi, Poloni, jug të Republikës Federale të Gjermanisë dhe në ish-Republikën Demokratike Gjermane (RDGJ). Shi i helmuar ra në Rumani dhe Bullgari. Brenda pak ditësh, reja mbuloi të gjithë hemisferën veriore.
Situata në RDGJ
Udhëheqja e RDGJ-së nuk publikoi matjet për kontaminimin radioaktiv të perimeve dhe qumështit. Këto produkte nuk u eksportuan dhe u shitën brenda vendit. "Asnjëherë dyqanet nuk kanë qenë më plot se atëherë", kujtojnë dëshmitarët. Ushqimet e kontaminuara u shpërndanë në mensat e shkollave, sipas fizikanit dhe ish-aktivistit për të drejtat e njeriut Sebastian Pflugbeil. Nxënësit, prindërit e të cilëve ndiqnin lajmet perëndimore, nuk i konsumuan. Të tjerët hanin dy ose tre porcione. Zyrtarisht, në RDGJ thuhej se nuk kishte rreziqe për shëndetin, shton Pflugbeil.
Bllokadë informimi në Bullgari
Në Bullgari u vendos bllokadë informimi për ditë të tëra. Mjekja dhe profesorja Paraskeva Ninova, e cila mbikëqyrte të gjitha spitalet, dha udhëzime të fshehta shefave të pavioneve: fëmijëve nuk duhej t’u jepeshin qumësht i freskët dhe sallatë në klinika. Këto masa kundër radioaktivitetit nuk u transmetuan publikut. Madje, manifestimet e 1 Majit në Sofie u zhvilluan nën shiun radioaktiv.