Altin Meçaj, 46-vjeçar nga Fieri, ka reaguar në rrjetet sociale duke publikuar foto nga spitali, ku shfaqen shenja dhune në trupin e tij.
Ai akuzon efektivin e policisë Fredi Lamaj si autor të dhunës ndaj tij dhe babait të tij të moshuar në banesën e tyre. Sipas Meçajt, shkak i konfliktit janë bërë mesazhet dhe pëlqimet që ai kishte bërë ndaj motrës së Lamajt në Facebook.
Në postimin e tij, Meçaj shkruan: “Të nderuar shqiptarë të vendit tim, jam dhunuar në banesën time në mënyrë çnjerëzore, nga njerëz me uniformën e policisë. Kërkoj mbështetjen tuaj. Kërkoj nga policia e shtetit dhe prokuroria të zbardhin ngjarjen dhe çdo person përfshirë të marrë dënimin e merituar. Unë kërkoj vetëm drejtësi, asgjë më shumë.”
Ndërkohë, motra e Fredi Lamajt ka hedhur poshtë pretendimet e Meçajt. Ajo ka deklaruar se vëllai i saj nuk ka lidhje me ngjarjen dhe, në lidhje me mesazhet, e ka denoncuar 46-vjeçarin për përndjekje.
Ngjarja pritet të hetohet nga organet kompetente për të sqaruar rrethanat dhe përgjegjësitë.