Një 70-vjeçar humbi jetën më 8 nëntor në fshatin Tale të Lezhës, pasi një pjesë e murit të banesës e zuri poshtë teksa po punonte. Sipas informacionit paraprak të Policisë, shtetasi me inicialet P. Q. ndodhej duke punuar në banesën e tij kur muri dyshohet se u shemb dhe e zuri poshtë.
I moshuari ndërroi jetë në vendngjarje si pasojë e dëmtimeve të marra. Pas njoftimit, në vendngjarje mbërritën shërbimet e Policisë dhe grupi hetimor, i cili nisi veprimet për zbardhjen e rrethanave.
Policia tha se paraprakisht dyshohet për një ngjarje aksidentale. Grupi hetimor po punon për sqarimin dhe dokumentimin e plotë të rrethanave, ndërsa shkaqet që çuan në shembjen e murit nuk janë përcaktuar ende.