Abdixhiku në akademinë përkujtimore: Rugova themelues nga historia

Lidhja Demokratike e Kosovës (LDK) mbajti të mërkurën akademi përkujtimore për ish-presidentin Ibrahim Rugova, në 20-vjetorin e vdekjes së tij. Kryetari i partisë, Lumir Abdixhiku, mbajti fjalim kushtuar figurës dhe trashëgimisë së tij politike.

Abdixhiku deklaroi se fjalët për të mungojnë dhe se Rugova nuk është figurë e momentit, por i kohës së gjatë. "Rugovën nuk mund ta përshkruajmë si një figurë për fotografi, por si mendim që duhet kuptuar. Dhe Rugova nuk është i lehtë për t’u kuptuar me fjali të shkurtra e besa as edhe të bukura. Ai nuk është slogan. Nuk është britmë. Nuk është as figurë e shpejtë për duartrokitje. Ai është proces. Është rrugë e gjatë. Është durim që nuk dorëzohet", tha ai.

Ai shtoi se njerëzit e kohës së gjatë nuk përshkruhen lehtë dhe nuk maten me ngjarje të vetme, por me drejtimin që ia ndryshojnë historisë. "Prandaj, sot nuk jemi këtu për të numëruar përvjetorë e vite. Jemi këtu për të pyetur veten: çfarë bëri ai me ne; dhe çfarë po bëjmë ne me atë që na la?"

Abdixhiku theksoi se Rugova asnjëherë nuk kërkoi rolin e heroit, por historia ia dha rolin e themeluesit. "Ai nuk e kërkoi kurrë rolin e heroit, por historia ia dha rolin e themeluesit. Nuk e kërkoi skenën, por skena u detyrua ta pranojë. Nuk kërkoi pushtetin për vete, por e ndërtoi pushtetin për një popull që kishte mbetur pa shtet."

Duke folur për formimin e Rugovës, ai vlerësoi se udhëheqësi historik nuk u formua në rehati, por në mungesë, humbje dhe padrejtësi. Këto përvoja i dhanë dimensionin e durimit dhe qetësisë politike. Rugova nuk hyri në politikë për pushtet, por për ta mbrojtur kulturën dhe identitetin kur liria mungonte. "Ai e kuptoi se fjala ka nevojë për shtëpi, dhe ajo shtëpi quhet shtet. Prandaj, kur themeloi Lidhjen Demokratike të Kosovës, ai e mori intelektualin me vete në politikë. Politika e tij nuk ishte e instinktit, por e mendimit; jo e thirrjeve të çastit, por e ideve afatgjata."