Kandidatja për deputete nga radhët e Lëvizjes Vetëvendosje, Adelina Tërshani, ka ndërmarrë hapa ligjorë duke denoncuar zyrtarisht rastet e përndjekjes dhe kërcënimeve online. Ajo ka depozituar në Policinë e Kosovës rreth 650 faqe dokumentacion, që përmbledhin qindra komente fyese dhe kërcënuese të drejtuara ndaj saj në hapësirën digjitale.
Sipas Tërshanit, ky veprim nuk synon kufizimin e kritikës politike, të cilën ajo e vlerëson si të domosdoshme në një shoqëri demokratike, por luftimin e gjuhës së urrejtjes dhe dhunës online. Ajo deklaroi se përdorimi i kërcënimeve për të frikësuar dhe larguar gratë nga jeta publike është një praktikë që duhet të ndëshkohet nga organet e drejtësisë.
“Shumë e kemi toleruar një kulturë ku njerëzit, të fshehur mbrapa ekraneve, mendojnë se mund të shpifin, të ofendojnë e të kërcënojnë pa asnjë pasojë. Interneti nuk është zonë pa ligj”, u shpreh ajo pas dorëzimit të materialeve. Tërshani, e cila është aktive në jetën publike prej 10 vjetësh, shtoi se pjesëmarrja e grave në politikë nuk duhet të shihet si akt guximi, por si një e drejtë themelore që duhet të ushtrohet pa pengesa dhe fyerje.