Administrata e Donald Trump planifikon ndërtimin e një baze ushtarake me kapacitet për 5 mijë persona në Gaza, sipas dokumenteve të shqyrtuara nga The Guardian. Baza do të shtrihet në një sipërfaqe më shumë se 350 hektarë ose 1 kilometër katror dhe do të shërbejë si qendër operative për Forcën Ndërkombëtare Stabilizimi (ISF), një trupë shumëkombëshe ushtarake.
ISF është pjesë e Bordit të Paqes, organizatë e sapokrijuar që synon të qeverisë Gazën. Bordi drejtohet nga Donald Trump, ndërsa rol udhëheqës ka Jared Kushner, dhëndri i tij. Ndërtimi parashikohet në faza, me dimensione përfundimtare 1400 metra me 1100 metra. Baza do të ketë 26 kulla vëzhgimi të blinduara, poligon për armë të lehta, bunkerë, magazinë pajisjesh ushtarake dhe do të rrethohet me tela me gjemba.
Vendi ndodhet në një zonë të thatë e sheshtë në jug të Gazës, të mbuluar me kripë, shkurre dhe mbeturina metali nga bombardimet izraelite. Kompani ndërkombëtare ndërtimi me përvojë në zona lufte kanë vizituar tashmë vendin, sipas një burimi të afërt me planet.
Qeveria indoneziane ka ofruar dërgimin e deri në 8 mijë trupave. Presidenti i Indonezisë ishte një nga katër liderët e Azisë Juglindore që morën pjesë në takimin inaugurues të Bordit të Paqes në Uashington.
Këshilli i Sigurimit i OKB-së ka autorizuar krijimin e ISF-së të përkohshme në Gaza. Detyrat përfshijnë sigurimin e kufijve, ruajtjen e paqes brenda territorit, mbrojtjen e civilëve dhe trajnimin e forcave të policisë palestineze të verifikuara. Rregullat e angazhimit në përleshje ose sulme mbeten të paqarta.
Përditësime
Roli i ISF-së në çarmatimin përfundimtar të Hamasit mbetet i paqartë, ndërsa Izraeli e vendos si kusht për nisjen e rindërtimit të Gazës.