Deputeti i zgjedhur i Lëvizjes Vetëvendosje (LVV), Adnan Rrustemi, ka shprehur optimizëm se bisedimet mes partive politike do të rezultojnë me marrëveshje për krijimin e institucioneve të reja. Ai bëri thirrje që opozita të heqë dorë nga ajo që e quajti “qasje bllokuese e 18 muajve të fundit”.
Rrustemi deklaroi se LVV, në bashkëpunim me partnerët e koalicionit Guxo dhe Alternativa, si dhe deputetët e komuniteteve joserbe, disponon votat e mjaftueshme për të konstituar Kuvendin dhe për të zgjedhur Qeverinë. Megjithatë, ai shtoi se zgjerimi i mundshëm i shumicës parlamentare do të varet nga gatishmëria e subjekteve të tjera politike.
Duke iu drejtuar opozitës, ai vlerësoi se nevojitet një minimum vullneti nga ana e tyre për të mundësuar një marrëveshje. Sa i përket procesit të krijimit të institucioneve, Rrustemi sqaroi se zgjedhja e Presidentit dhe krijimi i Qeverisë janë dy procese të ndara, të cilat mund të ndërlidhen nëse palët shfaqin vullnet politik.
Ai kërkoi që ditët deri në seancën konstituive të shfrytëzohen maksimalisht për dakordim politik, duke rikujtuar se ekziston edhe afati kushtetues prej 60 ditësh për zgjedhjen e Presidentit të vendit. Modalitetet e detajuara të bashkëpunimit pritet të përcaktohen në takimet e ardhshme ndërmjet drejtuesve të partive politike.