Aeroporti i Malpensas merr zyrtarisht emrin Silvio Berlusconi

Aeroporti ndërkombëtar Milano Malpensa zyrtarizoi sot emrin e ish-kryeministrit italian Silvio Berlusconi. Ceremonia e përurimit u zhvillua në Terminalin 1, ku u zbulua një pllakë përkujtimore në prani të anëtarëve të familjes Berlusconi, përfshirë vajzën Marina dhe vëllain Paolo, si dhe figurave të larta politike, mes tyre presidenti i Senatit Ignazio La Russa, zëvendëskryeministri Matteo Salvini, ministri i Jashtëm Antonio Tajani dhe presidenti i Lombardisë, Attilio Fontana. Vendimi për riemërtimin, i mbështetur nga qeveria dhe i miratuar nga Autoriteti i Aviacionit Civil (ENAC), u përball me kundërshtime të shumta ligjore që nga viti 2024. Bashkia e Milanos dhe disa bashki të tjera të rajonit të Varezes kërkuan ndalimin e këtij procesi, duke argumentuar se procedurat shkelnin rregullat për nderimet publike. Megjithatë, Gjykata Administrative Rajonale (TAR) e Lombardisë rrëzoi ankimimet, duke hapur rrugën për finalizimin e kësaj nisme. Kryetari i Bashkisë së Milanos, Giuseppe Sala, refuzoi të merrte pjesë në ceremoni. Ai shpjegoi se qëndrimi i tij ishte koherent me kundërshtimin e shprehur ndaj këtij vendimi, duke shtuar se në atë orar ndodhej në Inveruno për një tjetër aktivitet. Nga ana tjetër, zëvendëskryeministri Matteo Salvini shprehu keqardhje për mungesën e tij, duke e vlerësuar emërtimin si një njohje për kontributin e Silvio Berlusconit në historinë italiane. Për udhëtarët, ndryshimi mbetet kryesisht simbolik, pasi kodi IATA i aeroportit (MPX) mbetet i pandryshuar dhe për momentin nuk planifikohen ndryshime në sinjalistikën rrugore. Silvio Berlusconi, i cili themeloi partinë Forza Italia dhe ndërtoi një perandori të gjerë mediatike, ndërroi jetë në vitin 2023 në moshën 86-vjeçare.