Operacionet në Aeroportin e Mynihut, nyja e dytë më e ngarkuar ajrore në Gjermani, u ndërprenë përkohësisht mëngjesin e 30 majit 2026 për arsye sigurie. Vendimi u mor pasi u raportua prania e një objekti të dyshimtë në ajër, në afërsi të pistave të fluturimit.
Sipas zëdhënësit të Policisë Federale Gjermane, Stefan Bayer, alarmi u aktivizua rreth orës 09:00, pasi disa pilotë njoftuan për praninë e një objekti fluturues të paautorizuar. Ndërprerja e lëvizjeve ajrore zgjati për më shumë se një orë, periudhë gjatë së cilës u regjistruan vonesa dhe anulime në grafikun e fluturimeve.
Pas përfundimit të verifikimeve, autoritetet njoftuan rifillimin gradual të operimeve. Aeroporti u kërkoi pasagjerëve të verifikojnë statusin e udhëtimeve të tyre në faqet zyrtare. Policia Federale ka nisur hetimet për të identifikuar burimin e objektit dhe për të sqaruar rrethanat e incidentit, në një kohë kur raste të ngjashme janë shtuar në aeroporte të ndryshme europiane.
Përditësime
Aeroporti i Mynihut rifilloi operacionet në orën 10:05, pas kontrolleve të sigurisë për shkak të pranisë së një droni. Policia Federale konfirmoi se kërkimet me helikopter dhe në terren nuk gjetën objekte të dyshimta. Incidenti, i raportuar nga dy pilotë, pason mbylljet e ngjashme të aeroportit të ndodhura gjatë muajit tetor.
Për shkak të pranisë së një droni në Aeroportin e Mynihut, autoritetet e aviacionit devijuan fluturimet drejt Shtutgartit, Nurembergut dhe Frankfurtit. Operacionet e trafikut ajror kanë rifilluar pas ndërprerjes së përkohshme.