Ministri i Turizmit, Kulturës dhe Sportit, Blendi Gonxhja, bëri publike shifrat mbi fluksin e pasagjerëve në Aeroportin Ndërkombëtar të Tiranës për muajin gusht 2026. Sipas të dhënave, aeroporti ka regjistruar 1 milion e 717 mijë pasagjerë, duke konfirmuar trendin e rritjes së qëndrueshme të numrit të vizitorëve në Shqipëri. Kjo ecuri pason muajin korrik, i cili gjithashtu shënoi rritje me 28.1% krahasuar me të njëjtën periudhë të vitit të kaluar, me afro 1 milion e 650 mijë pasagjerë.
Sipas njoftimit, Aeroporti Ndërkombëtar i Tiranës është renditur ndër aeroportet me rritjen më të shpejtë në kategorinë e aeroporteve të mëdha në vlerësimet evropiane. Ministri Gonxhja theksoi se fluksi i lartë i udhëtarëve ndikon drejtpërdrejt në zhvillimin e ekonomive lokale dhe rritjen e konkurrueshmërisë së Shqipërisë në tregun ndërkombëtar të turizmit. Ndër vendet kryesore nga të cilat vijnë turistët janë Italia, Mbretëria e Bashkuar, Polonia, Turqia dhe Belgjika.
Krahas transportit ajror, flukse të larta janë raportuar edhe në pikat kufitare tokësore. Në pikën e kalimit kufitar të Morinës, vetëm gjatë periudhës 24–30 gusht, janë regjistruar mbi 203 mijë udhëtarë nga Kosova. Për periudhën maj-korrik, numri i qytetarëve nga Kosova që kanë hyrë në Shqipëri ka arritur në rreth 1.43 milionë.