Agjencia Kosovare e Privatizimit (AKP) ka njoftuar fillimin e një procesi të ri të shitjes së pasurive të ndërmarrjeve shoqërore në likuidim, të njohur si Shitja e Aseteve me Likuidim nr. 75 (ShAL 75). Kjo valë e shitjeve përfshin gjithsej 258 asete të shpërndara në të gjashtë rajonet e Kosovës, me qëllim nxitjen e zhvillimit ekonomik në sektorët e bujqësisë, banimit, tregtisë dhe shërbimeve.
Sipas njoftimit të institucionit, asetet e ofruara variojnë nga sipërfaqe të vogla për investitorë individualë, deri te prona të mëdha të përshtatshme për zhvillim rural, agrobiznes, logjistikë ose projekte banimi. Kategoritë e pronave përfshijnë njësi bujqësore me tokë të favorshme për pemëtari, objekte tregtare, depo dhe lokale afariste.
Procesi i dorëzimit të ofertave është caktuar për datën 9 shtator 2026. Të interesuarit duhet t'i paraqesin ofertat e tyre të mbyllura në Sallën e konferencave – Hoteli Grand në Prishtinë, në intervalin kohor nga ora 10:00 deri në orën 12:00. Çdo ofertë duhet të shoqërohet me depozitën përkatëse dhe tarifën e aplikimit, të përcaktuara sipas kritereve për secilën njësi.
Hapja e ofertave do të bëhet në të njëjtën ditë, duke filluar nga ora 12:30. Deri në këtë afat, palët e interesuara – përfshirë individë, biznese, diasporën dhe investitorët e huaj – mund të marrin informacione shtesë dhe të realizojnë vizita në pronat që janë nxjerrë në shitje. Agjencia u ka bërë thirrje të gjithë të interesuarve që të konsultohen me faqen zyrtare të AKP-së për të kuptuar kriteret e pjesëmarrjes dhe hollësitë mbi çdo aset të veçantë.