Agjentë të FBI ndodhen në Havana për të hetuar një incident me armë zjarri, i ndodhur më 25 shkurt midis rojës bregdetare kubane dhe një skafi me regjistrim nga Florida.
Lajmi u konfirmua nga një zyrtar i ambasadës së Shteteve të Bashkuara të Amerikës në Havana, i cili foli në kushte anonimiteti për agjencinë Agence France-Presse. Sipas tij, ekipi i FBI mbërriti të martën në Kubë në kuadër të një hetimi të pavarur mbi ngjarjen. Zëdhënësi i ambasadës nuk dha detaje të mëtejshme për praninë e agjentëve, në një kohë kur marrëdhëniet mes SHBA dhe qeverisë kubane mbeten të tensionuara.
Sipas autoriteteve kubane, një anije e rojës bregdetare iu afrua skafit për verifikim, por personat në bord reaguan duke hapur zjarr. Kuba e ka cilësuar incidentin si tentativë "infiltrimi me qëllime terroriste" nga një grup i armatosur, i cili dyshohet se kishte hyrë në territorin kuban për të destabilizuar qeverinë.
Si pasojë e përplasjes, katër persona në skaf u vranë në vend, ndërsa një i pestë ndërroi jetë disa ditë më vonë nga plagët. Pesë të tjerë janë arrestuar dhe përballen me akuza për terrorizëm.