Kryetari i Partisë Agrare Ambientaliste, Agron Duka, i ftuar në studion e News24, komentoi situatën e brendshme në Partinë Demokratike. Ai u ndal te përplasjet mes lidershipit dhe ish-deputetit Ervin Salianji, si dhe te përjashtimet e fundit të anëtarëve për shkak të mbështetjes ndaj tij.
Duka përmendi dy raste në Durrës: Arlind Boshkun dhe Dritan Burgijën, të cilët i njeh personalisht dhe ka bashkëpunuar me ta gjatë fushatave elektorale. Sipas tij, Burgija ka pasur hatërmbetje me PD-në, por nuk ka votuar kurrë PS-në. Boshku ka takuar Dukën në takime elektorale dhe ka mbështetur kandidatin e PAA-së në listën e PD-së.
Ai vlerësoi se këto përjashtime nuk janë të qarta dhe çojnë në dobësimin e opozitës. "Nuk e di pse i marrin këto vendime në PD, por besoj se kjo çon në bjerrjen e opozitës. Nuk forcohet kështu opozita", u shpreh Duka.
Kreu i PAA-së ngriti pikëpyetje mbi standardet demokratike brenda PD-së. "Nga një anë kërkojnë zgjedhje të ndershme, kjo nuk më duket e ndershme. Për këta dy personazhe që i njoh dhe i di si kanë rrjedhur ngjarjet në fushatë, jam i detyruar të flas", deklaroi ai.
Duka theksoi se një grup tjetër brenda PD-së ka mbështetur Salianjin. Sipas tij, kjo mbështetje duhej kanalizuar në një garë të hapur për kryetar partie. "Do ishte e udhës të gjenin mënyrën dhe të flisnin që ky grup të nxirrte kandidatin e vet në garë për kryetar partie, edhe pse një kryetar në detyrë është e vështirë të mundet. Rrezaton një figurë, unë po të isha do e kisha lejuar garën", tha ai.