Një aksident rrugor me pasojë vdekjen e një personi është regjistruar mbrëmjen e 28 janarit 2026, në aksin rrugor Tepelenë-Lopës, pranë kthesës që çon në fshatin Salari, Njësia Administrative Kurvelesh, Bashkia Tepelenë.
Ngjarja ka ndodhur rreth orës 20:55, në vendin e quajtur Ura e përroit. Një automjet tip furgon, i drejtuar nga shtetasi Arjan Çela, rreth 50 vjeç, banues në fshatin Dhëmblan, ka dalë nga rruga dhe është përmbysur. Si pasojë, drejtuesi i mjetit ka humbur jetën në vendngjarje.
Nuk dihet ende nëse në furgon ndodheshin pasagjerë të tjerë. Rrethanat e ngjarjes mbeten të paqarta.
Menjëherë në vendngjarje kanë mbërritur shërbimet e Policisë Rrugore dhe grupi hetimor. Ato po kryejnë veprimet e para hetimore për zbardhjen e shkaqeve.
Sipas njoftimit paraprak të policisë, automjeti ka dalë nga rruga mbi urë. Hetimi po vazhdon.