Një aksident me pasojë vdekjen u regjistrua mëngjesin e së dielës në qytetin e Vlorës. Ngjarja ndodhi në afërsi të ish-Stacionit të Trenit, ku një shtetas 78-vjeçar, i identifikuar si F. S., u përplas nga një automjet ndërsa po lëvizte me biçikletë.
Sipas informacioneve nga policia, i moshuari u transportua me urgjencë në Spitalin Rajonal të Vlorës për të marrë ndihmë mjekësore. Megjithatë, për shkak të plagëve të rënda të marra nga përplasja, ai ndërroi jetë pavarësisht përpjekjeve të mjekëve.
Shërbimet e Seksionit të Trafikut Urban dhe Interurban pranë DVP Vlorë kanë arrestuar në flagrancë drejtuesin e automjetit, 57-vjeçarin V. Xh., banues në Vlorë. Ai akuzohet për veprën penale "Shkelja e rregullave të qarkullimit rrugor". Grupi hetimor ndodhet në vendngjarje dhe po vijon punën për dokumentimin e plotë të rrethanave dhe përcaktimin e shkakut të aksidentit.