Një ngjarje tragjike është shënuar ditën e sotme në fshatin Kurtesh të Kolonjës, ku një punonjës 36-vjeçar ka humbur jetën gjatë orarit të punës. Viktima, i cili banonte në Pogradec, ishte i punësuar në një subjekt privat të licencuar për prodhimin dhe përpunimin e lëndës drusore.
Sipas të dhënave paraprake, aksidenti ndodhi teksa 36-vjeçari ishte duke ngarkuar trupa druri. Gjatë këtij procesi, një masiv druri është shkëputur aksidentalisht dhe e ka zënë atë poshtë. Si pasojë e plagëve të marra, i riu ka ndërruar jetë në vendngjarje.
Në vendin e ngjarjes kanë mbërritur shërbimet e Policisë dhe grupi hetimor, të cilët po kryejnë veprimet procedurale. Autoritetet po punojnë për të zbardhur shkaqet dhe rrethanat e plota të këtij aksidenti, si dhe për të verifikuar zbatimin e rregullave dhe kushteve të sigurisë në vendin e punës.