Një ngjarje e rëndë ka ndodhur gjatë ditës së sotme në Prishtinë, ku si pasojë e rrëzimit të një vinçi (krani), një punëtor ka ndërruar jetë, ndërsa një tjetër ka marrë lëndime trupore. Aksidenti ka ndodhur në një vendpunishte të vendosur në rrugën A, gjatë procesit të montimit të kësaj pajisjeje të rëndë.
Inspektorati Qendror i Punës (IQP), përmes një njoftimi zyrtar, bëri të ditur se subjekti ndërtimor, i identifikuar si Vëllezërit Asllani, nuk ka qenë i inspektuar më parë nga ky institucion. Sipas IQP-së, kjo ka ndodhur për shkak se punimet ishin ende në fazën e tyre fillestare, përkatësisht në procesin e realizimit të themeleve të objektit.
Në lidhje me shkaqet e këtij aksidenti, autoritetet inspektuese deklaruan se është ende herët për të nxjerrë një konstatim përfundimtar. Nevojiten hetime të mëtejshme dhe ekspertiza teknike për të zbardhur rrethanat e ngjarjes, si dhe për të vlerësuar nëse janë zbatuar masat e sigurisë dhe shëndetit në punë nga ana e subjektit ndërtues.
Ekipet e inspektimit kanë dalë menjëherë në vendin e ngjarjes dhe janë duke zhvilluar veprimet e nevojshme në koordinim me institucionet e tjera kompetente për të përcaktuar përgjegjësitë ligjore. Inspektorati Qendror i Punës i ka shprehur ngushëllimet familjes dhe kolegëve të viktimës, ndërsa ka uruar shërim të shpejtë për të lënduarin.
Përditësime
Autoritetet kanë sqaruar se aksidenti ndodhi në rrugën 'Holger Petersen' në Lagjen e Spitalit, dhe jo në rrugën 'A' siç u raportua fillimisht. Ngjarja rezultoi me vdekjen e një 26-vjeçari dhe lëndimin e një 18-vjeçari. Në operacionin e shpëtimit morën pjesë Brigada e Zjarrfikësve dhe Drejtoria për Siguri dhe Emergjenca e Komunës së Prishtinës. Kryetari Përparim Rama shprehu ngushëllime për familjen e viktimës, duke sqaruar se mbikëqyrja e standardeve në vendpunishte është përgjegjësi e Inspektoratit të Punës.
Mjeku kujdestar, Naser Syla, njoftoi se 26-vjeçari ndërroi jetë pas dy orësh përpjekje intensive për reanimim. Ndërkaq, një 18-vjeçar, i cili ka pësuar lëndime të rënda, ndodhet në gjendje stabile dhe po trajtohet në Klinikën e Kirurgjisë Torakale.