Departamenti për Krime të Rënda pranë Prokurorisë Themelore në Pejë ka ngritur aktakuzë ndaj të pandehurit me inicialet Xh.Sh., për shkak të dyshimit të bazuar se ka kryer tri vepra penale, në përputhje me Kodit Penal të Republikës së Kosovës.
Sipas njoftimit të prokurorisë, i pandehuri në cilësinë e bashkëshortit të viktimës, gjatë datave 22 dhe 23 shkurt 2026, dyshohet se ka përdorur forcën dhe kanosjen për të detyruar bashkëshorten e tij të kryejë veprime seksuale pa pëlqimin e saj. Përveç kësaj, i pandehuri akuzohet se për një periudhë kohore ka ushtruar dhunë fizike dhe psikologjike ndaj saj, duke cenuar sigurinë dhe mirëqenien e viktimës në ambientin familjar.
Në një tjetër pikë të aktakuzës, Xh.Sh. ngarkohet për veprën penale të mbajtjes në pronësi, kontroll apo posedim të paautorizuar të armëve. Gjatë veprimeve hetimore, forcat e rendit kanë gjetur dhe sekuestruar armë zjarri, municion dhe mjete të tjera, të cilat i pandehuri i mbante në kundërshtim me ligjet në fuqi.
Prokurori i Shtetit i ka propozuar gjykatës kompetente që, pas zhvillimit të shqyrtimit gjyqësor dhe administrimit të provave, i pandehuri të shpallet fajtor dhe të dënohet sipas ligjit për secilën nga veprat penale të pretenduara.