Organizimi i Lojërave Mesdhetare Prishtina 2030 mbetet një prej projekteve më të mëdha sportive dhe shtetërore në historinë e Kosovës. Megjithatë, vonesat në realizimin e infrastrukturës sportive dhe dinamika e punimeve kanë ngritur alarmin te komuniteti sportiv, duke shtuar presionin mbi institucionet përgjegjëse.
Presidenti i Komitetit Olimpik të Kosovës (KOK), Ismet Krasniqi, ka bërë një deklaratë të fortë lidhur me pasojat e një dështimi eventual. Sipas tij, dështimi në këtë organizim do të ishte një goditje e rëndë për shtetin dhe sportin e Kosovës. Krasniqi u shpreh: "Nuk po di çfarë fjale me gjet te dështimi sepse është shumë i madh. Mund të them që sikur të ia heqim një gjysmë pavarësie Kosovës, dështimi është shumë i madh. Duhet të punojmë 24 orë që të mos vijmë te dështimi, sepse nëse dështojmë, nuk do të ketë më besim për t'i dhënë Kosovës organizime të tjera".
Nga ana tjetër, kryetari i Federatës së Basketbollit të Kosovës, Arben Fetahu, konfirmoi se shqetësimi për ecurinë e përgatitjeve është i përbashkët për të gjithë komunitetin. Megjithatë, ai shprehu optimizëm se, me një angazhim të mirëfilltë institucional dhe përshpejtim të dinamikës, projekti mund të përfundohet me sukses, duke e krahasuar situatën me shtete të tjera që kanë arritur të organizojnë lojëra të ngjashme pavarësisht nisjes së vonë.
Edhe kryetari i Federatës së Hendbollit të Kosovës, Edi Kolgeci, ka nënvizuar se koha është e kufizuar dhe se nevojitet mobilizim i menjëhershëm. Ai theksoi se jemi në minutat e fundit për të dëshmuar përpara komunitetit sportiv ndërkombëtar se puna ka filluar dhe se Kosova është e gatshme për vitin 2030. KOK, federatat dhe institucionet shtetërore e shohin këtë projekt si një mundësi historike për të përmirësuar infrastrukturën dhe për të forcuar pozitën ndërkombëtare të vendit.