Kryeministri në detyrë dhe kandidati për kryeministër nga Lëvizja Vetëvendosje (LVV), Albin Kurti, ka reaguar pas mbylljes së vendvotimeve në zgjedhjet e zhvilluara këtë të shtunë.
Përmes një mesazhi publik, Kurti u ka bërë thirrje komisionerëve dhe vëzhguesve që të tregojnë përgjegjësi të lartë gjatë procesit të numërimit të votave, duke theksuar se legjitimiteti i të gjithë procesit varet nga korrektësia e tyre.
"Vullneti i qytetarëve i shprehur në zgjedhjet e sotme është brenda kutive të votimit. Mbrojtja e tij është kusht i pandashëm i legjitimitetit dhe kredibilitetit të procesit zgjedhor", është shprehur Kurti.
Ai ka vlerësuar peshën e detyrës së personelit të angazhuar në qendrat e numërimit, duke shtuar: "Në këto momente, sytë, veshët dhe vëmendja jonë janë te ju komisionerë dhe vëzhgues. Mbi juve peshon një përgjegjësi e lartë institucionale dhe fisnike".
Në fund të deklaratës së tij, Kurti ka falënderuar stafin për angazhimin dhe u ka uruar punë të mbarë në numërimin e çdo vote.