Kryeministri në detyrë i Republikës së Kosovës, Albin Kurti, zhvilloi sot një takim me komandantin e Misionit të NATO-s në Kosovë (KFOR), gjeneralmajorin Özkan Ulutaş. Takimi u mbajt në kuadër të konsultimeve të rregullta dhe koordinimit të vazhdueshëm ndërmjet institucioneve të Kosovës dhe misionit paqeruajtës.
Në qendër të bisedimeve ishte vlerësimi i situatës aktuale të sigurisë në vend dhe në rajon. Pjesëmarrësit diskutuan mbi format e bashkëpunimit ndërmjet Qeverisë, institucioneve të sigurisë dhe KFOR-it, me qëllim garantimin e paqes, stabilitetit dhe një mjedisi të sigurt për të gjithë qytetarët.
Gjatë këtij takimi, kryeministri Kurti vlerësoi lart komunikimin e vazhdueshëm me misionin e NATO-s dhe shprehu gatishmërinë e institucioneve qeveritare për të vijuar bashkëpunimin e ngushtë. Po ashtu, ai e falënderoi gjeneralmajorin Ulutaş për kontributin e tij dhe për bashkëpunimin me institucionet e Kosovës.
KFOR-i vazhdon të jetë një aktor kyç për sigurinë në vend, duke zbatuar mandatin e tij bazuar në Rezolutën 1244 të Këshillit të Sigurimit të OKB-së. Ky mision shërben si reaguesi i tretë i sigurisë, duke operuar në koordinim me Policinë e Kosovës dhe misionin e BE-së për Sundimin e Ligjit, EULEX, për të garantuar lirinë e lëvizjes dhe një ambient të qetë për të gjitha komunitetet që jetojnë në territorin e Kosovës.