Kryeministri i Republikës së Kosovës, Albin Kurti, vizitoi sot familjen e zyrtarit të ndjerë policor Altin Kryeziu në Malishevë, për t'u shprehur ngushëllimet e tij pas ndarjes nga jeta. Gjatë kësaj vizite, kreu i qeverisë vlerësoi lart kontributin dhe përkushtimin e Kryeziut në shërbim të qytetarëve, institucioneve të vendit dhe sundimit të ligjit.
Në librin e zisë, kryeministri Kurti la një mesazh përkujtimor, duke nënvizuar se i ndjeri do të mbetet në kujtesën e kolegëve, miqve dhe mbarë popullit si një zyrtar shembullor. Në shënimin e tij, Kurti theksoi se Altin Kryeziu shërbeu me nder dhe profesionalizëm gjatë gjithë karrierës së tij.
"Altin Kryeziu do të kujtohet gjithmonë nga kolegët e shokët, miqtë dhe i gjithë populli si zyrtar shembullor që shërbeu me profesionalizëm e nder për qytetarët e Republikës, sundimin e ligjit dhe interesin publik. Përkulemi para jetës dhe punës së tij! U prehtë në paqe!", shkroi kryeministri Kurti.