Kryeministri në detyrë i Kosovës, Albin Kurti, i shoqëruar nga ministrja në detyrë e Ekonomisë, Artane Rizvanolli, dhe kryeshefi i ndërmarrjes publike Ibër-Lepenci, Faruk Mujka, vizitoi sot digën e Ujmanit dhe hidrocentralin e kësaj ndërmarrjeje në Zubin Potok. Gjatë kësaj vizite, Kurti inspektoi infrastrukturën e liqenit, departamentin e ujit dhe procesin e gjenerimit të energjisë elektrike.
Rëndësia strategjike dhe kapacitetet
Kurti vuri theksin te rëndësia strategjike e ndërmarrjes për furnizimin me ujë të industrisë, veçanërisht të termocentraleve në Kastriot, si dhe për bujqësinë dhe amvisërinë. Sipas kryeministrit në detyrë, hidrocentrali, i cili operon me një kapacitet prej 35 megavatësh përmes dy turbinave, mbetet faktor kyç për qëndrueshmërinë financiare të ndërmarrjes. Ai nënvizoi se në Ibër-Lepenc punojnë bashkërisht dhjetëra punëtorë shqiptarë dhe serbë.
Performanca financiare
Sa i përket performancës financiare, Kurti raportoi se gjatë vitit 2025 ndërmarrja ka realizuar 12.8 milionë euro qarkullim, me një fitim neto prej 1.76 milionë eurosh pas heqjes së zhvlerësimit. Kjo vazhdon trendin pozitiv të nisur në vitin 2022, që shënon herën e parë të fitimit financiar pas luftës. Krahasuar me periudhën 2018–2021, ku ndërmarrja kishte raportuar 13.8 milionë euro humbje, periudha 2022–2025 ka sjellë një fitim total prej rreth 4.3 milionë eurosh.
Modernizimi dhe investimet
Një ndikim në stabilizimin e të hyrave ka pasur edhe tregtimi i energjisë në bursën e përbashkët Kosovë–Shqipëri, ALPEX, pjesë e së cilës ndërmarrja është nga viti 2024. Ndërkohë, ndërmarrja ka ndërmarrë hapa drejt modernizimit përmes një memorandumi bashkëpunimi me Agjencinë Zhvillimore të Francës (AFD) dhe ndërmarrjen SCP për studime fizibiliteti. Gjithashtu, me mbështetjen e Bankës Botërore, ka nisur studimi i diligjencës për rehabilitimin e hidrocentralit, raporti përfundimtar i të cilit pritet të dorëzohet brenda muajit shtator të këtij viti.