Kryeministri në detyrë i Kosovës, Albin Kurti, në një intervistë për gazetën austriake Die Presse, ka bërë të ditur se zgjedhjet e fundit parlamentare nuk kanë qenë një vendim i dëshiruar nga qeveria e tij, duke i cilësuar ato si të imponuara.
Duke komentuar rezultatet paraprake, Kurti pranoi se Lëvizja Vetëvendosje ka shënuar humbje në krahasim me zgjedhjet e mëparshme, por nënvizoi se partia e tij vijon të jetë forca më e madhe politike në vend. Sipas tij, kjo shënon fitoren e pestë të kësaj lëvizjeje në shtatë vitet e fundit.
"Kemi 43 për qind, por kjo shifër ende nuk përfshin votat e diasporës", u shpreh Kurti. Ai shtoi se procesi i formimit të qeverisë së re do të nisë pas shpalljes së rezultateve përfundimtare, përmes bisedimeve me partitë e tjera politike.
Në lidhje me strukturën e qeverisë së ardhshme, Kurti deklaroi se synon të ndjekë të njëjtën qasje si në mandatin e kaluar, duke siguruar përfaqësim për të gjitha grupet etnike në vend.