Ushtruesja e detyrës së Presidentes dhe kryetarja e Kuvendit të Kosovës, Albulena Haxhiu, ka reaguar lidhur me zhvillimet e fundit dhe përplasjet në Kuvend, duke kërkuar ndalimin e presioneve ndaj stafit profesional. Haxhiu nënvizoi se mospajtimet politike duhet të mbeten ekskluzivisht mes personave që mbajnë përgjegjësi politike.
Përmes një reagimi në rrjetin social Facebook, Haxhiu vlerësoi se është e padrejtë që zyrtarëve administrativë t’u atribuohen motive politike apo të krijohet përshtypja se ata u shërbejnë subjekteve të caktuara, për shkak se janë duke kryer detyrat e tyre institucionale. Ajo u bëri thirrje akterëve politikë që çdo pretendim ndaj saj ta adresojnë drejtpërdrejt ose përmes rrugëve zyrtare.
“Stafi i Kuvendit nuk është palë në betejat politike dhe nuk duhet të trajtohet si i tillë”, theksoi Haxhiu. Ajo dënoi publikisht sulmet dhe insinuatat ndaj personelit të administratës, duke kërkuar që çdo pretendim konkret ndaj punës së tyre të mbështetet me fakte dhe të zhvillohet përmes mekanizmave institucionalë. Ky reagim vjen pas kritikave të raportuara nga opozita, veçanërisht lidhur me mënyrën e komunikimit të Zyrës për Informim të Kuvendit.