Juristja Alesia Balliu u përjashtua ditën e djeshme nga Partia Demokratike (PD) e Elbasanit. Në emisionin Studio Live të Report TV me gazetarin Ermal Qori, ajo komentoi vendimin si privilegj.
Balliu tha se Sali Berisha e ka renditur krah Azem Hajdarit, i cili ishte përjashtuar më parë nga PD. "Jam lartësuar pasi Sali Berisha më ka privilegjuar duke më vënë në krah të demokratëve, në krah të individëve që guxojnë e luftojnë, në krah të individëve që ngrenë zërin. Më ka renditur në krah të Azem Hajdarit. Për mua është privilegj të renditem në krah të Azem Hajdarit", u shpreh ajo.
Sipas Balliut, përjashtimi erdhi për shkak të kandidaturës së saj për kryetares së PD-së. Ajo akuzoi Berishën se ka frikë garën dhe mendimin ndryshe, duke mos lejuar meritokraci në parti. Balliu e quajti Berishën shkak kryesor të qëndrimit të PD-së në opozitë dhe të mos ardhjes së saj në pushtet.
Ajo pretendoi se eksponentë të lartë të PD-së janë të lidhur me qeverinë e kryeministrit Edi Rama, bëjnë pazare dhe simulojnë sulme ndaj saj në media. Balliu akuzoi Berishën se përdor metoda si ato të Enver Hoxhës për të përjashtuar zëra kundërshtarë, se është kundër drejtësisë dhe ndërkombëtarëve, dhe se bën dëmin më të madh Shqipërisë duke mbajtur peng opozitën.
Balliu theksoi se linja e saj ka qenë kundër Berishës, jo kundër PD-së. Ajo nuk kurseu kritikat ndaj sekretarit të përgjithshëm të PD-së, Flamur Nokës, për të cilin tha se ka horizont të kufizuar mendor dhe rolin e "gomarit të Saliut". "Kur del Flamur Noka në konferencë për mediat, edhe mikrofonat rrinë serioz. Jo nga respekti, por nga frika se çfarë budallallëku do thotë", deklaroi ajo.