Ish-ministri i Drejtësisë, Enkelejd Alibeaj, ka komentuar thirrjen e Belind Këlliçit në Strukturën e Posaçme Kundër Korrupsionit dhe Krimit të Organizuar (SPAK), në lidhje me kallëzimet penale të depozituara për Kuvendin e 11 dhjetorit të mbajtur nga Sali Berisha në stadiumin “Air Albania”.
I ftuar në emisionin “Off the Record” me Andrea Dangllin, Alibeaj sqaroi se në atë periudhë janë paraqitur kallëzime për falsifikim stampash dhe vulash, si dhe për financimin e këtij Kuvendi. Ai theksoi se nuk ka qenë vetë firmëtar i këtyre kallëzimeve dhe se nuk mban mend detaje specifike.
Sipas Alibeajt, kallëzimet kryesisht nënshkruheshin nga sekretari i përgjithshëm i atëhershëm, Gazment Bardhi, sipas rregullave statutore dhe praktikës së zakonshme. “Të kërkoj ndjesë, nuk është se e mbaj mend, sepse sipas rregullave statutore, por edhe sipas praktikës, kallëzimet kryesisht nënshkruheshin nga funksionari që në atë rast ishte sekretari i përgjithshëm, zoti Gazment Bardhi,” deklaroi ai.
Ish-ministri nuk mund të konfirmojë ekzistencën e një kallëzimi të veçantë për financimin e Kuvendit të 11 dhjetorit. “Nuk di të të them tani nëse ka pasur apo jo një kallëzim të posaçëm lidhur me financimin e Kuvendit të 11 dhjetorit. S’ta them dot, ndjesë, nuk më vjen në mendje,” u shpreh Alibeaj.