Sali Berisha, kreu i Partisë Demokratike, zhvilloi sot një takim me mbështetësit dhe strukturat e partisë në zonën e Kombinatit në Tiranë.
Gjatë këtij takimi, foli Ilir Alimehmeti, kryetari i këshilltarëve bashkiakë të Partisë Demokratike në Këshillin Bashkiak të Tiranës. Ai më parë kishte marrë pjesë në takimet e Ervin Salianjit, përfshi atë në Durrës.
Në fjalën e tij, Alimehmeti kritikoi politikat shtetërore dhe problematikat në zonë. Ai u ndal te synimi për shembjen e banesave në Kombinat për ndërtimin e kullave, duke e cilësuar si qasje negative ndaj komunitetit.
"Këtë shtet e ka kapluar e keqja. Jemi të kapur nga narkotrafiku dhe të rinjtë po largohen nga vendi, ndaj duhet të angazhohemi", deklaroi ai. Ai përmendi gjithashtu mafian e ilaçeve në shëndetësi dhe mafian e ushqimeve.
Alimehmeti bëri thirrje për pjesëmarrje në protestën e Partisë Demokratike më 24 janar, duke e cilësuar atë të rëndësishme. Sipas tij, PD është parti e fjalës së lirë dhe këto qëndrime duhet të kthehen në veprime konkrete.
Ai theksoi rolin e strukturave bazë si shtyllë kurrizore të partisë dhe urë lidhëse mes qytetarëve dhe selisë qendrore. "PD i ka numrat e mëdhenj, por kjo matet me besimin që përcjell. Fitorja është e përbashkët, pavarësisht mendimeve të ndryshme", përfundoi ai.