Ambasadori i Republikës së Kosovës në Gjermani, Faruk Ajeti, zhvilloi një takim zyrtar me kryeministrin e Landit të Baden-Wurttembergut, Cem Özdemir. Ky ishte takimi i parë i kryeministrit Özdemir me një ambasador të një shteti evropian që nga marrja e detyrës së re.
Gjatë takimit, palët riafirmuan angazhimin për forcimin e partneritetit ndërmjet Kosovës dhe këtij landi gjerman. Fokus i veçantë iu kushtua krijimit të mekanizmave të rinj institucionalë për bashkëpunim në fushën politike, ekonomike dhe kulturore. Ambasadori Ajeti nënvizoi rëndësinë e Baden-Wurttembergut si një qendër e rëndësishme për mërgatën kosovare, duke e vlerësuar diasporën si urë lidhëse thelbësore midis dy vendeve.
Në lidhje me bashkëpunimin ekonomik dhe lëvizjen e qytetarëve, u theksuan lidhjet e fuqishme të transportit ajror. Aktualisht, janë planifikuar 25 fluturime direkte për çdo javë në vijën Prishtinë-Shtutgart, si dhe 4 fluturime të tjera në linjën me aeroportin Karlsruhe/Baden-Baden. Këto shifra u cilësuan nga ambasadori si dëshmi e dinamikës së lartë të marrëdhënieve midis bizneseve, familjeve dhe qytetarëve të të dyja vendeve.