Ambasadori Eric Wendt zhvillon takim me drejtuesit e SPAK

Ambasadori i Shteteve të Bashkuara në Tiranë, Eric Wendt, zhvilloi më 5 tetor 2026 një takim me drejtuesin e Strukturës së Posaçme Kundër Korrupsionit dhe Krimit të Organizuar (SPAK), Klodian Braho, si dhe me kreun e Byrosë Kombëtare të Hetimit (BKH), Joni Keta. Ky takim shënon një ndër kontaktet e para të diplomatit amerikan me drejtuesit e institucioneve kryesore të drejtësisë në Shqipëri. Sipas njoftimit të Ambasadës së SHBA, fokusi i diskutimeve ishte forcimi i bashkëpunimit dhe lufta ndaj sfidave të sigurisë, të cilat përbëjnë përparësi për administratën e Presidentit Donald Trump. Palët diskutuan mbi rolin e institucioneve të pavarura në përballimin e krimit transnacional, trafikimit të narkotikëve dhe migracionit të paligjshëm. Ambasadori Wendt vuri në dukje se partneriteti mes Shteteve të Bashkuara dhe Shqipërisë është thelbësor për garantimin e sundimit të ligjit dhe ndërtimin e një të ardhmeje më të sigurt për të dy kombet. Ky takim zhvillohet në kuadër të një sërë takimesh që diplomati amerikan po zhvillon me përfaqësues të institucioneve kryesore shqiptare, pas marrjes zyrtare të detyrës. Deri më tani, ambasadori Wendt është takuar me Presidentin Bajram Begaj, Kryeministrin Edi Rama, kryeparlamentarin Niko Peleshi dhe ministrin e Jashtëm Ferit Hoxha.