Ambasadori i Bashkimit Evropian në Kosovë, Aivo Orav, deklaroi se sulmi në Banjskë mbetet çështje serioze që kërkon përgjegjësi dhe drejtësi.
Në një takim me gazetarë më 22 mars 2026, ai theksoi se autorët duhet të përballen me ligjin. “Sa i përket sulmit në Banjskë, Bashkimi Evropian e ka bërë të qartë, kryesit duhet të sillen para drejtësisë. Këtu nuk janë vetëm fjalë… kjo duhet të bëhet dhe një ditë do të ndodhë”, u shpreh Orav.
Orav vlerësoi se sulmi në Banjskë është temë e ndjeshme që duhet diskutuar në kuadër të dialogut Kosovë-Serbi, e jo përdorur si pengesë për vazhdimin e tij. “I kuptoj plotësisht problemet që i përmendët në lidhje me sulmin në Banjskë… por këto çështje mund të diskutohen. Nëse nuk diskutohen, atëherë nuk arrijmë asgjë”, tha ai.
Ambasadori ritheksoi se dialogu mbetet mekanizmi i vetëm për të adresuar çështje të tilla dhe për të arritur stabilitet afatgjatë në rajon. “Këto çështje mund të diskutohen… por nëse nuk diskutohen, nuk mund të ketë zgjidhje”, përfundoi Orav.
Sulmi ndodhi më 24 shtator 2023 në Banjskë të Zveçanit, ku një grup serbësh të armatosur sulmoi Policinë e Kosovës, duke vrarë rreshterin Afrim Bunjaku. Gjatë këmbimit të zjarrit u vranë edhe tre sulmues serbë. Përgjegjësinë për sulmin e ka marrë Millan Radoiçiq, ish-nënkryetar i Listës Serbe, partisë kryesore të serbëve në Kosovë që gëzon mbështetjen e Beogradit.