Ambasadorja e Kosovës në Izrael, Ines Demiri, ka zhvilluar një vizitë inspektimi në punimet që po zhvillohen për ndërtimin e bazës logjistike "Life Support Area Endurance". Njoftimi është bërë i ditur nga Bordi i Paqes përmes një komunikate në platformën "X".
Sipas njoftimit zyrtar, baza do të ketë një rol strategjik për Forcën Ndërkombëtare Stabilizuese (ISF), duke mundësuar furnizimin, mirëmbajtjen dhe riorganizimin e forcave. Infrastruktura pritet të lehtësojë operacionet e rimëkëmbjes dhe shpërndarjen e ndihmave humanitare në zonë. Bordi i Paqes nuk ka bërë të ditura detaje shtesë lidhur me afatet e përfundimit të këtij projekti apo kapacitetet e plota të bazës.
Angazhimi i Kosovës në këtë mision bazohet në marrëveshjen e anëtarësimit në Bordin e Paqes, e cila u ratifikua në Kuvendin e Kosovës në prill të vitit 2026 me 103 vota pro. Presidentja e Kosovës, Vjosa Osmani, e kishte nënshkruar më herët Kartën e këtij bordi gjatë pjesëmarrjes në Forumin Ekonomik Botëror në Davos. Pjesë e këtij angazhimi është edhe dërgimi i trupave kosovare në kuadër të ISF-së, të cilat do të asistojnë në proceset e rindërtimit dhe administrimit pas konfliktit në Gazë.