Prej disa javësh, në qytetin e Tiranës po zhvillohen protesta të cilat kanë tërhequr vëmendjen e opinionit publik. Një element qendror në diskursin e zhvilluar është përcaktimi i këtyre tubimeve nga përfaqësues të qeverisë dhe mediat pranë saj si "protesta të bukura".
Analistja Diana Gëllçi e vë në pikëpyetje këtë përshkrim, duke e lidhur atë me konceptin e "mitit politik" të shtjelluar nga filozofi francez Roland Barthes në esenë "Myth Today", pjesë e veprës "Mythologies" (1957). Sipas Gëllçit, përdorimi i këtij termi shërben si një mjet për të krijuar një narrativë ku protesta paraqitet si një dukuri harmonike dhe e natyrshme, duke anashkaluar motivet politike që qëndrojnë në thelb të saj.
Analiza thekson se, njëlloj si në shembullin e Barthes për "përshëndetjen e ushtarit" që legjitimonte kolonializmin francez, etiketimi i protestave në Shqipëri si "të bukura" synon të krijojë një alibi politike. Kjo qasje shndërron një ngjarje reale në një simbol që i shërben narrativës së qeverisë, duke e paraqitur situatën si të qetë dhe të pranueshme nga të gjitha palët.