Kompania Anthropic ka realizuar një studim ku një intervistues i inteligjencës artificiale ka pyetur 81 mijë njerëz në 159 vende dhe në 70 gjuhë për përdorimin e inteligjencës artificiale në jetën e tyre.
Intervistuesi AI ka formuluar katër pyetje të hapura, ka dëgjuar përgjigjet dhe i ka përshtatur pyetjet pasuese. Më pas, një inteligjencë artificiale tjetër ka analizuar, koduar dhe kategorizuar përgjigjet për të nxjerrë rezultatet.
Studimi nxjerr në pah se njerëzit nuk ndahen qartë në optimistë dhe pesimistë për zhvillimin e inteligjencës artificiale. Ata ndahen sipas nevojave të tyre, të cilat formohen nga kushtet ku jetojnë dhe nga ajo që shoqëritë e tyre ofrojnë ose nuk ofrojnë.
Në vendet e pasura dhe me zhvillim teknologjik të avancuar, njerëzit duan që AI t’u japë kohë për të menaxhuar kompleksitetin e jetës.
Në ekonomitë në zhvillim dhe në tranzicion, njerëzit kërkojnë akses në mundësi.
Evropa Juglindore, përfshirë Ballkanin Perëndimor, ndodhet në këtë pikë kthese: ende jo mjaft e pasur për t’i kërkuar AI-së komoditete, por duke i kërkuar ato gradualisht.