Dhoma e Apelit e Dhomave të Specializuara të Kosovës në Hagë miratoi pjesërisht kërkesën e mbrojtjes së Hashim Thaçit, Kadri Veselit, Rexhep Selimit dhe Jakup Krasniqit për rritjen e kufirit të fjalëve në njoftimet e apelit kundër aktgjykimit të shkallës së parë. Sipas vendimit të publikuar më 28 tetor, mbrojtja mund të përdorë deri në 7 mijë fjalë, në vend të kufirit të zakonshëm prej 3 mijë fjalësh.
Mbrojtja kishte kërkuar që kufiri të rritej në 9 mijë fjalë, duke argumentuar se gjatësia dhe kompleksiteti i çështjes kërkojnë më shumë hapësirë për paraqitjen e bazave të ankesës.
Në arsyetimin e vendimit, trupi gjykues mori parasysh se aktgjykimi i shkallës së parë, i publikuar më 16 shtator 2026, përmban 2.089 faqe dhe është më i gjati i nxjerrë ndonjëherë nga Dhomat e Specializuara. Gjykata mori parasysh gjithashtu kompleksitetin e çështjes dhe nevojën që palët të paraqesin në mënyrë kuptimplotë pretendimet e tyre në apel.
Megjithatë, gjyqtarët e vlerësuan të tepruar kërkesën për 9 mijë fjalë. Sipas trupit gjykues, cilësia dhe efektiviteti i një ankese nuk varen nga gjatësia, por nga qartësia dhe argumentimi i pretendimeve.
Dhoma e Apelit sqaroi se njoftimet duhet të identifikojnë gabimet e pretenduara në aktgjykim dhe zgjidhjen e kërkuar. Argumentet e hollësishme duhet të paraqiten në parashtresat e apelit. Afati për dorëzimin e njoftimeve është caktuar më 27 nëntor 2026.