Aprilia Tuareg Racing fitoi titullin e përgjithshëm dhe atë të kategorisë M5 për motoçikletat me dy cilindra në Kampionatin Evropian Tout Terrain Rally Cup 2026. Thomas Marini u shpall kampion i Evropës në të dyja klasifikimet, ndërsa bashkëgaruesi i tij, Jacopo Cerutti, përfundoi në vendin e dytë. Ky është titulli i parë evropian i ekipit në klasifikimin e përgjithshëm.
Marini e fitoi titullin në sezonin e tij të parë me motoçikletën Aprilia Tuareg Rally. Garuesi nga San Marino e nisi kampionatin në Santiago de Compostela të Spanjës, ku përfundoi i dyti në klasifikimin e përgjithshëm, pas Ceruttit, dhe fitoi dy etapa.
Në garën e radhës, në Pefki Evia të Greqisë, Marini mori dy fitore ditore në kategorinë e tij. Në raundin e fundit, në Râmnicu Sărat të Rumanisë, ai siguroi fitoren e tij të parë të përgjithshme, me katër fitore ditore dhe podium në çdo etapë.
Cerutti e përfundoi kampionatin si nënkampion i Evropës, duke plotësuar suksesin e dyfishtë të Aprilias në të dyja klasifikimet. Italiani kishte fituar dy gara të përgjithshme, në Spanjë dhe Greqi, por u tërhoq pas një rrëzimi të rëndë në raundin e fundit në Rumani, ku po luftonte me Marinin për titullin.
“Jam shumë i lumtur që fitova titullin evropian në klasifikimin e përgjithshëm dhe në kategorinë time, veçanërisht pasi ky është viti im i parë me Aprilian. Të fitosh me një motoçikletë dhe ekip të ri është burim i madh krenarie”, tha Marini, duke vlerësuar edhe punën e përbashkët me ekipin GCorse.
Në Kosovë, Aprilia përfaqësohet nga Ventoro Motors by Auto Mita. Ky triumf i shtohet sukseseve të Aprilia Tuareg Racing në garat jashtë rruge: dy fitoreve radhazi në Africa Eco Race, në vitet 2024 dhe 2025, si dhe tre titujve radhazi në Italian Motorally, nga viti 2023 deri më 2025.