Ish-zëvendëskryeministri Arben Ahmetaj, gjatë një interviste në emisionin Çim Peka LIVE në SYRI TV, paralajmëroi publikimin e pjesëve të reja nga një përgjim voluminoz. Ai bëri të ditur se disponon gjithsej 3 orë material, nga të cilat janë bërë publike vetëm 12 minuta deri më tani.
Sipas Ahmetajt, këto materiale përbëjnë dëshmi mbi mënyrën se si funksionon shteti dhe pasqyrojnë një situatë shqetësuese në institucionet shqiptare. Ai konfirmoi se pasazhet e reja pritet të publikohen javën e ardhshme, megjithëse la të hapur mundësinë që kjo të ndodhë edhe më herët, si reagim ndaj kërcënimeve që ai pretendon se merr nga palë të ndryshme, përfshirë prokurorë, ish-prokurorë dhe përfaqësues të organizatave.
Duke iu përgjigjur pyetjeve për përgjimet e realizuara në Monaco, Ahmetaj u shpreh se qyteti, së bashku me Mynihun, ka shërbyer si qendër për fotografi dhe regjistrime ku janë përfshirë ish-ministra, ish-sekretarë, ish-vëllezër dhe ish-kunetër. Ai e përshkroi situatën si një dëshmi të kapjes së shtetit, duke sjellë në vëmendje raportet e mëparshme të Bankës Botërore.
Në lidhje me prejardhjen e materialeve, Ahmetaj deklaroi se nuk e di kush i ka dërguar dhe theksoi se çdo përgjim që i ka mbërritur e ka bërë publik menjëherë, pa bërë kompromise përballë kërcënimeve. Ai hodhi poshtë çdo pretendim për lojëra me dosjen e tij dhe u shpreh se nuk i bën përshtypje reagimi i kompanive të përmendura në materiale.
Përditësime
Ish-zv/kryeministri Arben Ahmetaj denoncoi sot kërcënime të drejtpërdrejta ndaj tij, familjes së tij dhe stafit të SYRI TV. Në të njëjtën dalje publike, Ahmetaj artikuloi akuza të ashpra ndaj kryeministrit Edi Rama, duke e lidhur atë me çështje të shëndetit mendor dhe duke vënë në pikëpyetje integritetin e të kaluarës së tij politike.