Deputeti i Lidhjes Demokratike të Kosovës (LDK), Arben Gashi, ka reaguar pas dorëzimit të nënshkrimeve për thirrjen e Kuvendit të Jashtëzakonshëm të këtij subjekti politik. Ai e ka cilësuar këtë proces si një ushtrim të domosdoshëm të demokracisë së brendshme dhe të përgjegjësisë politike.
Sipas Gashit, pas rezultateve të tri proceseve zgjedhore të fundit, elektorati ka dërguar një mesazh të qartë. Ai vlerëson se LDK-ja ka nevojë për reflektim, vendimmarrje dhe një vizion të ri për t'u rikthyer si forcë udhëheqëse në vend.
"Kjo nuk është betejë kundër një individi, por kërkesë për një standard më të lartë politik, për llogaridhënie dhe për një LDK më të fortë", ka deklaruar Gashi përmes një reagimi publik. Ai ka theksuar se Kuvendi mbetet institucioni ku duhet të përcaktohet drejtimi i partisë, duke bërë thirrje që ky proces të zhvillohet me guxim dhe përgjegjësi.
Në përfundim të reagimit të tij, Gashi ka shprehur synimin për një Lidhje Demokratike të Kosovës "që bashkon, udhëheq dhe fiton përsëri".