Pas votimit të Qeverisë Kurti 3, deputetja e Lëvizjes Vetëvendosje Arbërie Nagavci, e cila në mandatin e kaluar drejtoi Ministrinë e Arsimit, ka reaguar duke thënë se ka diskutuar me kryeministrin Albin Kurti qysh pas zgjedhjeve të 9 shkurtit për angazhime të tjera.
Ajo deklaroi: “Pas zgjedhjeve të 9 shkurtit me kryeministrin kemi diskutuar qysh në atë kohë për angazhime të tjera dhe kontributin tim në pozita tjera. Mbi të gjitha do të jem deputete, shpejt i shohim dhe angazhimet tjera”.
Jashtë kabinetit të ri qeveritar kanë mbetur gjithashtu zëvendëskryeministri i parë Besnik Bislimi dhe ministrja e Industrisë, Ndërmarrësisë dhe Tregtisë Rozeta Hajdari. Në vend të Rozeta Hajdarit është emëruar Mimoza Kusari Lila, ndërsa në vend të Arbërie Nagavcit është emëruar Hajrulla Çeku.
Rozeta Hajdari foli për mospropozimin e saj sërish në postin e Ministrisë së Industrisë, Ndërmarrësisë dhe Tregtisë. Ajo u shpreh e lumtur që këtë detyrë e ka kolegia Mimoza Kusari Lila dhe mohoi se aktakuza e ngritur ndaj saj ka ndikuar në vendim. “Unë i uroj suksese qeverisë së re. Jam e lumtur që zonja Kusari Lila e ka postin e ministres së Industrisë, Ndërmarrësisë dhe Tregtisë. Nuk është patjetër një me qenë, duhet me pas një kombinim më të mirë”, tha ajo.