Kryetari i Aleancës për Ardhmërinë e Kosovës, Ardian Gjini, u ka bërë thirrje zyrtare Partisë Demokratike të Kosovës (PDK) dhe Lidhjes Demokratike të Kosovës (LDK) për të bashkuar forcat në formimin e një qeverie të opozitës. Sipas Gjinit, ky bashkëpunim është i nevojshëm për të shmangur dëmet e mëtejshme që mund t'i shkaktohen vendit.
Në deklaratën e tij, Gjini u shpreh i shqetësuar për atë që e cilësoi si lajthitje të një pjese të elektoratit lidhur me raportet e Kosovës me Shtetet e Bashkuara të Amerikës. Ai theksoi se cënimi i marrëdhënieve me aleatët strategjikë është në dëm të drejtpërdrejtë të interesave të shtetit dhe qytetarëve.
"Kam një drojë se lajthitja e një pjese të elektoratit e ka arritur atë nivel sa nuk po e kuptojnë që kushdo që është kundër Amerikës është kundër Kosovës. Është kaq e thjeshtë dhe nuk mund të interpretohet në asnjë mënyrë tjetër", deklaroi ai.
Ndërkohë, Gjini pranoi se, pavarësisht faktit që Aleanca do të ishte partneri më i vogël në një koalicion të mundshëm, ai ka të drejtën dhe obligimin të kërkojë këtë bashkëpunim, duke paralajmëruar se nëse situata aktuale vazhdon, Kosova do të përballet me pasoja të rënda.