Deputeti i Partisë Socialiste, Ardit Bido, ka reaguar publikisht ndaj një video-mesazhi të shpërndarë nga Lefter Nika, kryetar i partisë MEGA, e cila përfaqëson minoritetin grek në Shqipëri. Në këtë video, Nika u bën thirrje qytetarëve dhe pjesëtarëve të minoritetit etnik grek që t'i bashkohen protestave që po zhvillohen prej ditësh në Tiranë, Sarandë dhe Shkodër, duke i cilësuar ato si lëvizje paqësore dhe civilizuese.
Në kundërpërgjigjen e tij, Bido ka kundërshtuar hapur mbështetjen e Nikës, duke e lidhur atë me pjesëmarrjen e kreut të MEGA-s në parada ku përdoret flamuri i Spiro Milos. Sipas deputetit socialist, ky simbol lidhet me ngjarje historike të dhunshme në jug të Shqipërisë, ku ai pretendon se janë vrarë mbi 10 mijë shqiptarë, janë djegur dhjetëra fshatra dhe është dëbuar një e treta e popullsisë së zonës.
Në qëndrimin e tij, Bido deklaroi se për sa kohë protestuesit mbështeten nga figura të tilla, ai do të jetë kundër tyre. Deputeti shkoi më tej duke deklaruar: "Sa keni këta në krah, jo thjesht më keni KUNDËR, por po bëni tradhëti!"