Kombëtarja e Argjentinës mbylli fazën përgatitore për Kupën e Botës 2026 me një fitore bindëse 3-0 kundër Islandës. Ndeshja, e zhvilluar para 88 mijë tifozëve në stadiumin e Auburnit, shërbeu si test i fundit për kampionët në fuqi.
Trajneri Lionel Scaloni aktivizoi një formacion eksperimental, duke e lënë Lionel Messin në stol deri në minutën e 70-të. Kapiteni argjentinas, i cili po rikuperohej nga një dëmtim i lehtë, pati ndikim të menjëhershëm. Pak çaste pas hyrjes në fushë, ai shërbeu për Lautaro Martínez, i cili u ndal me faull në zonën e rreptësisë. Nga pika e bardhë, Messi shënoi golin e tij të 117-të me përfaqësuesen në ndeshjen e tij të 199-të.
Avantazhin për argjentinasit e kishte krijuar që në minutën e 8-të Valentín Barco me një goditje nga distanca, ndërsa rezultatin përfundimtar e vulosi Thiago Almada në minutën e 86-të, pas një aksioni të nisur nga Messi dhe Rodrigo De Paul.
Argjentina do ta nisë rrugëtimin e saj në Grupin J të Kupës së Botës më 16 qershor, ku do të përballet me Algjerinë në Kansas City.