Pas vendimit të Qeverisë së Kosovës për të trajtuar kërkesën e Kuvendit lidhur me plotësimin dhe ndryshimin e Ligjit për Dhomat e Specializuara dhe Zyrën e Prokurorit të Specializuar, ka reaguar kryetari i Grupit Parlamentar të Partisë Demokratike të Kosovës (PDK), Arian Tahiri. Në një deklarim të bërë përmes rrjeteve sociale, ai ka theksuar se çdo çështje që ndërlidhet me Ushtrinë Çlirimtare të Kosovës (UÇK) duhet të trajtohet me seriozitetin më të lartë.
Sipas Tahirit, temat që prekin themelet e lirisë së vendit kërkojnë përgjegjësi, sinqeritet dhe korrektësi maksimale nga të gjithë akterët politikë. Ai ka bërë thirrje që këto çështje të mos shfrytëzohen për interesa të ngushta apo për të nxitur përçarje, duke vënë theksin te nevoja për unitet kombëtar. "Siç e kam thënë përherë, UÇK-ja duhet të na bashkojë! Pa kalkulime politike. Pa interesa të ngushta. Pa përçarje. Në çështjet që prekin themelet e lirisë sonë, duhet të jemi bashkë", ka shkruar ai në postimin e tij.
Ky reagim vjen në një kohë kur çështjet që lidhen me gjykatën në Hagë janë rikthyer në fokusin e debatit publik. Nisma për ndryshimin e legjislacionit përkatës është iniciuar nga PDK-ja, si pasojë e zhvillimeve të fundit dhe aktgjykimeve dënuese ndaj ish-krerëve të UÇK-së.