Klubi italian Sassuolo ka njoftuar zyrtarisht se ka ushtruar të drejtën për blerjen e kartonit të portierit të Kombëtares së Kosovës, Arijanet Muric, nga skuadra angleze Ipswich Town. Ky vendim pason periudhën e huazimit të 27-vjeçarit në Itali gjatë sezonit të kaluar.
Sipas njoftimit zyrtar, për këtë transferim përfundimtar është paguar një dëmshpërblim prej 7 milionë eurosh. Gjatë sezonit 2025/2026, Muric regjistroi gjithsej 32 paraqitje në të gjitha garat, duke u angazhuar për 2.880 minuta lojë. Me këtë kontribut, ai ndihmoi Sassuolon ta mbyllë kampionatin e Serie A në vendin e 11-të. Ndonëse gjatë pjesës më të madhe të sezonit portieri tregoi formë të lartë, në ndeshjet e fundit ai pati një rënie të minutave në fushë.
Karriera e Arijanet Muric përfshin eksperienca të shumta në klube të njohura evropiane. Ai është zhvilluar si futbollist te Manchester City, ndërsa më herët ka qenë pjesë e ekipeve si NAC Breda, Nottingham Forest, Girona, Willem II, Adana Demirspor, Burnley dhe Ipswich Town.
Përditësime
Ipswich Town ka konfirmuar zyrtarisht largimin e portierit Arijanet Muric, i cili është transferuar përgjithmonë te Sassuolo. Muric, i cili iu bashkua klubit anglez nga Burnley në verën e vitit 2024, regjistroi gjithsej 19 paraqitje. Vlera e transferimit nuk është bërë publike, duke hedhur poshtë raportimet e mëparshme për një shifër prej 7 milionë eurosh.