Klubi i Bayern Munich ka zyrtarizuar rikthimin dhe integrimin e sulmuesit Arijon Ibrahimovic në skuadrën e parë për sezonin e ri. Ky vendim konfirmon se futbollisti do të jetë pjesë e planeve të trajnerit Vincent Kompany.
Drejtori sportiv i Bayern Munich, Christoph Freund, vlerësoi progresin e 20-vjeçarit, duke theksuar rëndësinë e huazimeve për zhvillimin e tij. "Arijoni iu bashkua Bayernit kur ishte 12 vjeç. Ai ka përparuar hap pas hapi përmes akademisë sonë dhe huazimeve të menduara mirë. Tani nuk bëhet më vetëm fjalë për të mësuar, por për të lënë gjurmë te Bayern", deklaroi Freund.
Arijon Ibrahimovic iu bashkua akademisë së Bayern Munich në vitin 2018, pas largimit nga 1. FC Nürnberg. Debutimin e tij me skuadrën profesioniste e pati në shkurt të vitit 2023, në përballjen kundër VfL Bochum, kur ishte 17 vjeç. Përveç eksperiencës së suksesshme te 1. FC Heidenheim, ai ka kaluar periudha huazimi edhe në futbollin italian, te Frosinone dhe Lazio.
Në arenën ndërkombëtare, futbollisti ka debutuar me kombëtaren U-21 të Gjermanisë në nëntor dhe numëron dy paraqitje zyrtare. Gjithashtu, janë raportuar bisedime me Federatën e Futbollit të Kosovës (FFK) lidhur me mundësinë e përfaqësimit të Kombëtares së Kosovës në të ardhmen.