Ambasada e Kosovës në Washington ka njoftuar se shteti i Arizonës e ka njohur zyrtarisht 17 shkurtin si Ditën e Pavarësisë së Kosovës. Ky vendim erdhi nëpërmjet një akti të guvernatores Katie Hobbs.
Akti i lëshuar nga Zyra e Guvernatores thekson se shteti i Arizonës ndihet i nderuar të qëndrojë pranë komunitetit shqiptaro-amerikan në të gjithë territorin për të përkujtuar 17 shkurtin 2008, ditën kur Republika e Kosovës shpalli pavarësinë në Prishtinë. Ky akt historik u bazua në parimet e sovranitetit dhe vetëvendosjes, duke shënuar një moment kyç në rrugën drejt lirisë dhe duke konfirmuar statusin e Kosovës si shtet i pavarur.
Guvernatorja Katie Hobbs mori parasysh këto arsye kryesore:
- Përvjetorin e 18-të të pavarësisë së Kosovës, të njohur me krenari nga shteti i Arizonës.
- Kontributet e rëndësishme të komunitetit shqiptaro-amerikan në Arizona, përfshirë trashëgiminë kulturore, shpirtin sipërmarrës dhe angazhimin qytetar.
- Bizneset dhe arritjet profesionale të shqiptarëve, që pasurojnë strukturën sociale dhe ekonomike të larmishme të shtetit.
- Mbështetjen e Shteteve të Bashkuara, përfshirë Arizonën, për rrugëtimin e Kosovës drejt ndërtimit të shtetit dhe paqes, si dhe kontributet e vazhdueshme të qytetarëve kosovarë dhe pasardhësve të tyre në zhvillimin kulturor dhe ekonomik.
Në përfundim, guvernatorja Katie Hobbs shpalli 17 shkurt 2026 si "Ditën e Pavarësisë së Kosovës në Arizona", duke nënshkruar dokumentin zyrtar. Ambasada e Kosovës falënderoi guvernatoren për këtë njohje në nivel shtetëror, që riafirmoi mbështetjen për vlerat e lirisë dhe pavarësisë.