Presidenti i Federatës Shqiptare të Futbollit, Armand Duka, ka dërguar një mesazh urimi për presidentin e Federatës Spanjolle të Futbollit, Rafael Louzán, pas suksesit historik të Spanjës, e cila u shpall kampione e Kupës së Botës 2026.
Në mesazhin e tij, Duka vlerësoi paraqitjen e spanjollëve gjatë gjithë turneut, duke e cilësuar triumfin si dëshmi të qartë të cilësisë, punës dhe vizionit që karakterizon futbollin spanjoll.
“Urime për fitimin e Kupës së Botës FIFA 2026! Ishte një rrugëtim i jashtëzakonshëm dhe një triumf plotësisht i merituar. Spanja tregoi futbollin më të mirë gjatë gjithë turneut dhe fitoi me meritë trofeun më të rëndësishëm në futbollin botëror”, shprehet Duka në mesazhin e tij.
Kreu i FSHF-së vlerësoi gjithashtu përpjekjet e vazhdueshme për zhvillimin e futbollit në Spanjë dhe arritjet e ekipit kombëtar në arenën ndërkombëtare. Në përmbyllje të komunikimit, ai uroi suksese të mëtejshme për Rafael Louzán, përfaqësuesen spanjolle dhe gjithë komunitetin e futbollit në Spanjë për vitet në vijim.